Detaje të reja janë zbardhur nga ngjarja e rëndë e regjistruar sot në rrugën “Petrela”, në Bathore të Kamzës, ku një efektiv i Policisë Ushtarake dyshohet se vrau me armë zjarri dy vëllezër dhe plagosi rëndë vëllain e tretë.
Sipas informacioneve paraprake, tre vëllezërit dhe autori i dyshuar, Ngushëllim Manzi, ishin fqinjë. Shkak për konfliktin që përfundoi në tragjedi dyshohet se është bërë një mur rrethues në oborrin e banesës së vëllezërve.
Tre vëllezërit ishin me origjinë nga Tropoja, ndërsa 40-vjeçari i arrestuar është nga Tirana. Sipas informacioneve të bëra publike, pas arrestimit ai nuk ka dhënë deklarata për ngjarjen, ndërsa dyshohet se ka përdorur armën e shërbimit gjatë konfliktit.
Viktimat janë identifikuar si Selam Islamaj, rreth 30 vjeç, dhe Nazmi Islamaj, 48 vjeç. Vëllai i tyre, Shefqet Islamaj, rreth 44 vjeç, mbeti i plagosur dhe vijon të jetë nën kujdesin e mjekëve.
Njoftimi i Policisë
“Vrau me armë zjarri, për motive të dobëta, 2 shtetas dhe plagosi 1 tjetër, kapet dhe vihet në pranga autori i dyshuar.
Pas njoftimit të marrë për të shtëna me armë zjarri, në rrugën ‘Petrela’, në Bathore, shërbimet e Komisariatit të Policisë Nr. 5 shkuan menjëherë në vendngjarje.
Nga veprimet e para rezultoi se, gjatë një konflikti për motive të dobëta ndërmjet shtetasit N. M. dhe tre vëllezërve, S. I., N. I. dhe Sh. I., konflikti u përshkallëzua në përdorimin e armës së zjarrit.
Si pasojë, shtetasi S. I., rreth 30 vjeç, humbi jetën, ndërsa shtetasit N. I., 48 vjeç, dhe Sh. I., rreth 44 vjeç, u plagosën dhe u transportuan për në spital, ku 48-vjeçari humbi jetën, ndërsa 44-vjeçari vijon të jetë në kujdesin e mjekëve.
Si rezultat i veprimeve të shpejta policore, u kap dhe u arrestua autori i dyshuar i rastit, shtetasi N. M., rreth 40 vjeç, punonjës i Policisë Ushtarake.
Gjithashtu, u sekuestrua arma e zjarrit (pistoletë), e dyshuar e përdorur për krimin.
Grupi hetimor po vijon punën për dokumentimin e plotë ligjor të ngjarjes dhe sqarimin e rrethanave të saj.”
Hetimet vijojnë për të zbardhur plotësisht dinamikën e konfliktit që përfundoi me vrasjen e dy vëllezërve dhe plagosjen e të tretit.
