Vlorë/ Shpërthim me lëndë plasëse në Llakatund, dëmtohet makina e administratorit të Shushicës, Igli Bimaj

Një automjet në pronësi të administratorit të Njësisë Administrative Shushicë, Igli Bimaj, është dëmtuar dyshohet nga shpërthimi i një sasie lënde plasëse në orët e para të mëngjesit të sotëm, në fshatin Llakatund të Vlorës.

Ngjarja është regjistruar rreth orës 02:50, ndërsa automjeti ishte i parkuar pranë banesës së 29-vjeçarit.

Sipas informacionit paraprak të Policisë, nga shpërthimi është dëmtuar automjeti, ndërsa deri më tani nuk ka të dhëna të bëra publike për persona të lënduar.

Grupi hetimor ka mbërritur në vendngjarje dhe po punon për zbardhjen e plotë të rrethanave, dokumentimin ligjor të rastit, si dhe identifikimin dhe kapjen e autorit ose autorëve të dyshuar.

Deri në këto momente, nuk ka një informacion zyrtar mbi motivet e mundshme të ngjarjes.