Princi i Monakos, Alberti II ka mbërritur sot në Shqipëri, me ftesë të Presidentit të Republikës, Ilir Meta, ku dhe u prit me ceremoni zyrtare nga Kreu i Shtetit në ambientet e Presidencës.
Gjatë ceremonisë në “Pallatin e Brigadave”, presidenti Meta në shenjë vlerësimi i ka dorëzuar Princit të Monakos “Dekoratën e Flamurit Kombëtar”.
Presidenti Meta theksoi faktin se kjo është dekorata më e lartë, që shqiptarët iu dorëzojnë miqve të tyre, ndërsa shprehi mirënjohjen për Princin Alberti II, për njohjen e Kosovës.
“Dita e sotme, historike për marrëdhëniet dypalëshe midis Shqipërisë dhe Principatës së Monakos. Në emër të shqiptarëve i akordoj Dekoratën e “Flamurit Kombëtar” Princit të Monakos . Kjo është dekorata më e lartë, me të cilën ne shqiptarët nderojmë e respektojmë miqtë tanë më të mirë. Mirënjohje të veçantë për njohjen e Shtetit të Kosovë”, tha Presidenti Meta.
NDërsa kreu i shtetit vlerësoi rëndësinë e bashkëpunimit konkret, në fushat ku eksperienca dhe ekspertiza e Monakos është shumë e njohur ndërkombëtarisht, si në turizëm e në mbrojtjen e mjedisit, zhvillimin e ekonomisë së gjelbër, inovacion e teknologjinë, në shërbimet financiare etj., kërkoi nga Princi nxitjen e biznesit të Monakos që të eksplorojë dhe investojë në tregun shqiptar.
