Najada Çomo hoqi dorë nga mandati i deputetit ditën e sotme, duke krijuar një vakancë në radhët e të zgjedhurve socialiste në Kuvendin e Shqipërisë. Sipas Kodit Zgjedhor, Çomo, e cila mbante numrin dy në listën e socialistëve të 25 Prillit, do të zëvendësohet nga kandidatja grua pasuese në listë me numrin më të madh të votave.
Kandidatja e cila vjen e para në listën e socialistëve dhe që ka mbledhur më shumë vota është ish-ministrja e Mbrojtjes Mimi Kodheli. Në një prononcim Mimi Kodheli me një përgjigje diplomatike dhe jo të drejtëpërdrejtë la të kuptonte se do ta merrte mandatin e deputetit.
“Sipas kodit zgjedhor më takon mua”, u shpreh Kodheli. Duket se posti i zëvendëspresidentes së Asamblesë Parlamentare të NATO-s, nuk do ta pengojë angazhimin e Mimi Kodhelit për përfaqësimin e qytetarëve të Tiranës në Kuvend. Teksa nuk kemi ende një përgjigje të qartë, nën ethe qëndron socialistja tjetër në listë, Dallëndyshe Bici, e cila shkon në parlament vetëm nëse Mimi Kodheli refuzon mandatin e deputetit.