Teksa tensionet mes Kosovës dhe Serbisë sa vijnë e shtohen si pasojë e taksës 100% për importet serbe, Hashim Thaçi dhe Aleksandër Vuçiç u pritën në Bruksel nga përfaqësuesja e lartë për politikën e Jashtme në BE, Federica Mogherini, në një takim të përbashkët me liderët e Ballkanit Perëndimor, ku mungoi Kryeministri Rama.
Shefja e diplomacisë europiane konfirmoi se krerët rajonalë mbështesin marrëveshjen përfundimtare Prishtinë – Beograd dhe i nxiti ata për bashkim drejt objektivit të përbashkët për integrim.
Presidenti Hashim Thaçi u shfaq optimist pas takimit, duke thënë se marrëveshja me Serbinë mund të arrihet së afërmi.
“Shpresoj dhe besoj do të punojmë bashkarisht që në javët dhe muajt e ardhshëm të arrijmë në një përfundim në arritjen e marrëveshjes finale Kosovë – Serbi, dhe Kosova do të arrijë konsolidimin në rrafshin ndërkombëtar”.
Por të njëjtin optimizëm nuk e ndan Presidenti serb Aleksandër Vuçiç, i cili ia bëri të qartë zonjës Mogherini se pa u hequr taksa 100% për importet serbe, nuk ulet në tryezë me palën kosovare. Sipas B92, presidenti serb e sheh ende larg zgjidhjen.
Më herët gjatë ditës, Serbia pati përballjen e radhës me Brukselin në Këshillin e Stabilizim – Asocimit, ku u fol gjithashtu për taksën e vënë nga Kosova. Kryeministrja Ana Brnabiç tha se tatimi 100% po i shkakton një efekt të ndjeshëm negativ ekonomisë serbe.
“Ekonomia serbe ka humbur që prej vendosjes së taksës 25.7 milionë Euro. Presim që deri në fund të vitit humbja të arrijë 65.5 milionë Euro. Dhe nëse masat qëndrojnë përgjatë vitit 2019, presim një humbje vjetore 514.5 milionë Euro”.
Prej 21 Nëntorit, mallrat serbe që hyjnë në Kosovë tatohen me 100% të vlerës.
