Partitë politike me axhenda të ngjeshura po vazhdojnë fushatën zgjedhore në Kosovë. Ato po shpalosin programin e tyre para elektoratit, përfshirë edhe qasjen e partive të tyre ndaj dialogut Prishtinë-Beograd.
Ndërkohë edhe Bashkësia Ndërkombëtare ka nisur presionet e saj që menjëherë pas zgjedhjeve të rinisë dialogu i mbetur në gjysmë, ndërmjet këtyre dy vendeve.
SHBA-ja tashmë ka marrë rol kyç në rinisjen e dialogut, ndërsa mbetet e paqartë se si do të jetë roli i Bashkimit Evropian në këtë dialog. Megjithatë është raportuar se BE-ja, ashtu si SHBA, do të caktojë një të emëruar të posaçëm për dialogun.
Ndërkohë Presidenti i Francës, Emmanuel Macron, ka paralajmëruar se do të ketë rol aktiv në këtë dialog, menjëherë pas zgjedhjeve në Kosovë.
Për analistin Milazim Krasniqi, kjo nënkupton që të gjitha palët e kanë marrë seriozisht çështjen e marrëveshjes finale Kosovë-Serbi. Madje ai thotë se në këtë mënyrë ka gjasë të organizohet një konferencë ndërkombëtare për këtë çështje.
“Droja ime është që tashmë po krijohen premisat për organizimin e një konference të re ndërkombëtare për Kosovën ku do të jenë të përfshira, SHBA-ja, BE-ja, Franca, Gjermania dhe sipas të gjitha gjasave edhe Rusia”.
Por ajo që është e sigurtë, sipas tij, është që Kosovë menjëherë pas zgjedhjeve nuk do të humbë kohë në krijimin e qeverisë së re, madje ai thotë se do të ketë një koalicion më të gjerë qeverisës.
“Duket që Kosova do të ketë nevojë për formimin urgjentë të qeverisë”.
Dialogu Prishtinë-Beograd është ndërprerë pas taksës që qeveria e Kosovës i ka vënë 100% produkteve serbe në Nëntor të vitit të kaluar. Tv Klan
