“Nga 1 janari i vitit të ardhshëm dhe deri në fund të 2020, do të mbyllen të gjitha sportelet që i shërbejnë qytetarëve dhe shërbimet do të bëhen online, së paku aplikimet”. Kështu deklaroi sot Kryeministri Edi Rama duke renditur 7 prioritetet e qeverisë për 2 vitet e ardhshme. “Jo çdo shërbim mund të bëhet me ciklin online komplet. Në 1 janar do të jenë rreth 40% e shërbimeve që do të jepen online. Nuk ka nevojë të çosh letra. Deri në qershor do të jenë 67% dhe deri në fund të vitit do të shkojnë në thuajse 100%”, tha Rama. Kryeministri tha se “nuk duhet të ketë më kontakte mes qytetarit që shërbehet dhe atyre që shërbejnë, që na e morën fytyrën në sportelet e shërbimeve”.
“Qytetari duhet të aplikojë duke depozituar vetëm dokuementet e veta individuale, jo ato që jep shteti. Nëse duhen 20 dokumente që ndodhen në zyrat e shtetit dhe dy dokumente individuale, psh. nga banka apo punëdhënësi, qytetari do të paraqesë vetëm këto të dyja. Gjithë të tjerat do të bëhen brenda zyrave të shtetit, do t’i marrin ata që sot punojnë në sportele që do të kthehen nga gjobëvënës në shërbëtor duke plotësuar dosjet e qytetarëve. Dhënia e licencës bëhet me komunikim siç bën sot plaforma e bashkëqeverisjes, që na krijoi mundësinë të shikojmë me sytë tanë ndryshimin mes komunikit online dhe sy më sy”, tha Rama. Ai theksoi se “mbyllja e sporteleve do të sjellë dhënien e shërbimeve pa kontakt dhe dërgimin e dosjeve të plotësuara te familjet drejtpërdrejt”. /j.p/
