Shumë emigrantë, janë kthyer në Shqipëri dhe kanë ngritur sipërmarrjen e tyre mbi bazën e përvojës dhe eksperincës që kanë fituar në vende të ndryshme të Europës dhe më gjerë.
Ministri i Shtetit për Sipërmarrjen, Eduard Shalsi, solli shembullin e Brunës, që është diplomuar në Itali për Filozofi por me një pasion të madh për modën, ajo u kthye në Shqipëri për të krijuar një shtëpi mode.
“Prej tre vitesh tashmë prodhon veshje, në një mjedis ku përfshihen zyrat e dizajnit dhe modelimit e deri tek prerja, qepja dhe së fundmi përgatitja për eksport”, shprehet Shalsi.
Bruna e ka të regjistruar markën e saj në Itali dhe njihet në të gjitha vendet europiane.
Shalsi thekson se, “i gjithë prodhimi shkon për eksport në Itali dhe është në nivel të ngjashëm prodhimi me shumë kompani të tjera me emër në tregun italian”.
Gjatë një vizite në biznesin e Brunës, ministri thotë se fokusi i bashkë diskutimit ishte kapërcimi i vështirësisë nga situata e krijuar nga pandemia, si edhe problematikat që kishte hasur me gjetjen e punonjësve të kualifikuar.
“Dëgjova me kënaqësi planet e Brunës për zgjerimin e gamës së produkteve duke futur në treg edhe veshjet sportive”, tha Shalsi, ndërsa u shpreh se lehtësitë fiskale që ka ndërmarrë qeveria për biznesin dhe politikat mbështetëse janë një nxitje për sipërmarrjet e reja dhe rritjen e të punësuarve.
