Në kuadër të nismës “Dhuro libra”, ka nisur dërgimi i kontigjentit të parë të librave të destinuar për shtetasit shqiptarë që vuajnë dënimin në Institucionet e Ekzekutimit të Vendimeve Penale në Greqi. Kjo nisëm është një bashkëpunim i Ministrit të Shtetit për Diasporën, Ministrisë së Drejtësisë dhe Ministrisë për Europën dhe Punët e Jashtme, njoftoi sot MEPJ.
Gjithashtu, thekson MEPJ, një dërgesë tjetër librash për këtë qëllim, u nis sot për në Itali. “Shpërndarja e tyre në institucionet penitenciare do të realizohet më 21 shkurt, në Ditën Ndërkombëtare të Gjuhës Amtare”, nënvizon MEPJ.
MEPJ shton se, “falë kontributit të shtëpive të ndryshme botuese, institucioneve dhe individëve të ndryshëm, u bë i mundur sigurimi i rreth 10 mijë librave, të cilët do të shpërndahen nga përfaqësitë diplomatike dhe konsullore të Shqipërisë, të akredituara në Itali dhe Greqi”.
Nisma “Dhuro Libra”, e iniciuar nga Ministri i Shtetit për Diasporën, Pandeli Majko, vjen si një angazhim i institucioneve shtetërore për të ofruar mbështetje njerëzore për të gjithë shtetasit shqiptarë që janë në kushtet e vuajtjes së dënimeve me heqje lirie në vende të ndryshme, si dhe si një përpjekje që synon të lehtësojë rehabilitimin dhe riedukimin e tyre.
