Një burrë nga Teksasi ka humbur jetën pasi mori pjesë në një “party-COVID”, sepse ai mendonte se koronavirusi është një mashtrim. Sipas Shefes së Mjekësisë Metodistike të Kujdesit Shëndetësor në Teksas, Dr. Jane Appleby, personi në fjalë ishte vetëm 30 vjeç. Appleby tha për mediat se pacienti, identiteti i të cilit nuk është bërë i ditur, kishte marrë pjesë në të ashtuquajturën party-COVID para se të infektohej me koronavirus. Kjo festë u mbajt nga dikush që ishte diagnostikuar i prekur me COVID-19 dhe ideja e festës ishte për të vërtetuar nëse virusi është i vërtetë, pra nëse dikush do të infektohej. Pas kohë pas festës 30-vjeçari u sëmur rëndë.
Appleby tha se ndërsa ishte në spital, pak para se të vdiste, ai i tha infermierit të tij: “Unë mendoj se bëra një gabim, mendova se kjo ishte një shaka, por nuk është ashtu.” “Ai nuk besoi me të vërtetë. Ai mendoi se sëmundja ishte një shaka. Ai mendoi se ishte i ri dhe ishte i pathyeshëm dhe nuk do të preket nga virusi”, -u shpreh Appleby. Appleby tha se ajo vendosi të dilte dhe të fliste publikisht për këtë rast, sepse në Qarkun Bexar, San Antonio, shkalla e pozitivitetit të koronavirusit është rritur nga 5%, që ishte disa javë më parë, në 22%. Ajo theksoi se njerëzit duhet të kuptojnë që ky virus është shumë serioz, mund të përhapet lehtësisht dhe askush nuk është i pathyeshëm. Ajo tha se kohët e fundit ka parë shumë raste të koronavirusit te njerëzit rreth 20-30 vjeç dhe se lutja e vetme e saj për komunitetin dhe veçanërisht për të gjithë të rinjtë, është që ta marrin seriozisht dhe të mbajnë maskën.
