Në vijim të dhurimit të parë për Policinë e Shtetit dhe për Drejtoritë Vendore të Policisë, PAMECA V, në bashkëpunim dhe në emër të Delegacionit të Bashkimit Europian, ka dhuruar për Institutin e Policisë Shkencore, pajisje për mbrojtjen personale, që përfshijnë 560 veshje pune teknike, 6000 doreza, 2000 maska për fytyrën dhe 65 litra alkool etilik.
Sipas njoftimit të Policisë, këto pajisje për mbrojtjen personale i dhurohen Institutit të Policisë Shkencore në Policinë e Shtetit si ndihmë ndaj masave parandaluese kundër përhapjes së virusit COVID dhe për qëllimet e nevojave të hetimit të vendit të ngjarjes.
Zv.drejtoresha e përgjithshme e Policisë së Shtetit Aida Hajnaj falënderoi D’Achille për këtë iniciativë dhe mbështetjen e vazhdueshme ndaj Policisë së Shtetit, duke iu referuar veçanërisht këtij dhurimi të nevojshëm për Institutin e Policisë Shkencore. Drejtuesi i Projektit PAMECA V, Carlo D’Achille deklaroi gjatë ceremonisë së dhurimit se bashkëpunimi me Policinë e Shtetit në konsiderohet të ketë një rëndësi të madhe për PAMECA V dhe vlerësoi lart mundësinë për të ofruar një mbështetje të tillë të dobishme gjatë kësaj kohe të vështirë.
