Dyshohen si vrasës me pagesë/ Vinçesk Piroli dhe dy të arrestuarit e tjerë nën hetim për tre vrasje
Tre personat e arrestuar nga Policia e Lezhës, mes tyre Vinçesk Piroli, dyshohen si autorë të tre vrasjeve të kryera gjatë dy viteve të fundit.
Sipas gazetares Xhensila Kodra, grupi hetimor po mbledh prova për dyshimet se ata vepronin si vrasës me pagesë. Ata dyshohet se kanë ekzekutuar Artan Myrtajn, i njohur si “Tani i Ruzhdiut”, në Sarandë, si dhe dy persona të tjerë në qarkun e Shkodrës dhe në Mirditë. Piroli dyshohet të ketë qenë ekzekutori kryesor.
Piroli dhe Ymeri u arrestuan teksa lëviznin të armatosur dhe me skafandra, me një motomjet të vjedhur në Suedi. Ndërsa Tarja dyshohet se do t’i ndihmonte të largoheshin me automjet pas kryerjes së krimit.
Gjatë operacionit, policia sekuestroi tri pistoleta, municion luftarak, motomjetin dhe një automjet tip “Volkswagen”. Hetimet vijojnë për dokumentimin e plotë të ngjarjeve dhe përcaktimin e rolit të secilit prej të dyshuarve.
