Tragjedia në dasma/ 16-vjeçari Enes Isaku humbi jetën nga rënia e ashensorit, arrestohet kolegu 26-vjeçar
Enes Isaku, vetëm 16 vjeç, do të përcillet këtë të hënë për në banesën e fundit, pasi humbi jetën në një aksident tragjik në ambientet e lokalit të dasmave “AV Wedding Center”, ku punonte si kamarier gjatë fundjavave.
Sipas informacioneve paraprake, adoleshenti po bënte shaka pranë ashensorit me kolegun e tij, Endri Stafuka, 26 vjeç. Ky i fundit dyshohet se e ka shtyrë Enesin brenda kabinës dhe ka shtypur butonin për katin e parë. Menjëherë pas mbylljes së derës, ashensori dyshohet se ka pësuar defekt, duke u rrëzuar deri në katin zero pas shkëputjes së kavove.
Përplasja rezultoi fatale për 16-vjeçarin, i cili humbi jetën në vendngjarje. Pas aksidentit, policia arrestoi 26-vjeçarin, ndaj të cilit është ngritur akuza për “vrasje nga pakujdesia”.
Në kuadër të hetimeve po shqyrtohen edhe rrethanat e përdorimit të ashensorit pak çaste para ngjarjes. Sipas raportimeve, pronari i lokalit, Afrim Vathi, i cili është edhe gjyshi i viktimës, ishte ngjitur me ashensor deri në katin e sipërm pak përpara aksidentit.
Hetimet vijojnë për të përcaktuar shkaqet teknike të defektit dhe përgjegjësitë për tragjedinë që tronditi familjen e 16-vjeçarit.
