Një 50-vjeçar shqiptar është shpëtuar nga autoritetet italiane. Mësohet se shqiptari ishte nisur për peshkim nga Vlora drekën e së enjtes por mjeti me të cilin lundronte pësoi defekt në motor.
Ky është momenti ku një 50 vjeçar shqiptar është shpëtuar nga Roja Bregdetare italiane në Kanalin e Otrantos.
Shqiptari identiteti i të cilit nuk dihet ende ishte nisur për peshkim nga brigjet e Vlorës, por mjeti me të cilin lundronte pësoi defekt në motor duke e lënë për disa orë në mes të detit të trazuar.
Alarmi për ndihmë është lëshuar nga vetë peshkatari rreth orës 14:30 të së enjtes. Ai ka njoftuar autoritetet italiane se ndodhej rreth 25 milje nga Otranto.
Pas disa orësh, Roja Bregdetare Italiane ka bërë të mundur lokalizimin dhe shpëtimin e shqiptarit.
Sipas medieve italiane, 50-vjeçari ndodhej në gjende të rënduar psikologjike ndërsa i është nënshtruar menjëherë kontrolleve mjekësore. Pas marrjes së ndihmës nga ekipi mjekësor italian gjendja e tij shëndetësore është paraqitur e mirë.
