Një 26-vjeçar është arrestuar nga policia për llogari të Italisë. Në kuadër të operacionit ndërkombëtar të koduar “Grand Tour” u kap në Tiranë shtetasi Stivi Filolli, i shpallur në kërkim ndërkombëtar për veprat penale “Grup i strukturuar kriminal” dhe “Trafikimi i narkotikëve”, parashikuar nga Kodi Penal i Italisë.
Filolli dyshohet si pjesë e rrjetit ku bënte pjesë edhe shqiptari Ergys Dashi i ekzekutuar më 22 janar në Guayaquil të Ekuadorit.
Kapja e personit u bë falë bashkëpunimit të FAST Albania me strukturat e DVP Tiranë.
“Në rrugën “Haxhi Dalliu”, Tiranë, është bërë e mundur kapja dhe arrestimi i shtetasit S. F., 26 vjeç, i shpallur në kërkim ndërkombëtar për veprat penale “Grup i strukturuar kriminal” dhe “Trafikimi i narkotikëve”, parashikuar nga Kodi Penal i Italisë”.
Operacioni policor i koduar “Grand Tour” u zhvillua në disa shtete, në kuadër një hetimi të nisur nga Njësia Hetimore e Karabinierëve të Torinos, Itali, kundër një grupi të organizuar kriminal.
Ky operacion është finalizimi i një hetimi të nisur nga Njësia Hetimore e Karabinierëve të Torinos, Itali, kundër një grupi të organizuar kriminal, me aktivitet në disa shtete të ndryshme.
Hetimet janë koordinuar nga zyra e Prokurorit Publik të Drejtorisë Antimafia, autoritetet sllovene dhe EUROJUST.
