Pas bjellorusëve dhe ukrainasve, tashmë janë polakët që kanë zgjedhur të pushojnë në Shqipëri, pasi 3 chartera me turistë zbarkuan në Rinas. Ministri i Turizmit tha se mbërritja e tyre është shpresëdhënëse në një sezon kaq të vështirë turistik. Më shumë se 600 turistë polakë zbarkuan këtë të martë në aeroportin ndërkombëtar Nënë Tereza. Destinacioni i pushimeve për 2 javët e ardhshme ishte qyteti bregdetar i Durrësit, ndërsa situata me të prekurit me koronavirus duket se nuk i ka ndalur, që të mos anulonin prenotimet.
Ministri i Turizmit, Blendi Klosi, teksa priti charterin e parë nga Polonia, u shpreh se mbërritja e tyre, është shpresëdhënëse për këtë sezon turistik. “Pritëm tre chartera me turistë nga Polonia. Është vit i vështirë por edhe brenda vështirësive të këtij viti do të kemi përsëri turizëm në bregdetin shqiptar”. Kreu i Unionit Turistik, Rrahman Kasa, theksoi se situata me pandeminë mbetet ende problematike, por fluturimet do të vijojnë.
“Mendojmë që çdo javë të kemi 6 avionë që do të vazhdojnë deri në fund të shtatorit. Sot kishim katër avionë dhe një u tërhoq nga situata e rritjes së numrave në Shqipëri. Shpresojmë që situata të mos përkeqësohet”. Polonia ka një bilanc me rreth 38 mijë të prekur dhe 1500 viktima nga nisja e pandemisë, ndërsa në 24 orët e fundit, janë regjistruar 300 raste të reja. Në aeroport, turistët iu nënshtruan kontrollit të temperaturës, për të vijuar më tej me udhëtimin drejt Durrësit.
