Ambasada e Shteteve të Bashkuara të Amerikës në Tiranë, së fundmi ka shpërndarë një postim të bërë nga kryebashkiaku i Vlorës, Dritan Leli. Ambasada e SHBA shkruan se janë shumë krenar me partneritetin me Bashkinë e Vlorës. Ata kanë falënderuar Dritan Lelin për mbështetjen, ndërsa shtojnë se duhet fuqi për rinin në 30 vitet e ardhshme.
“Këndet tona Amerikane në të gjithë Shqipërinë përfaqësojnë miqësinë midis SHBA dhe Shqipërisë. Ne jemi shumë krenarë për partneritetin tonë të fortë me Bashkinë e Vlorës. Faleminderit, Kryetari Leli për mbështetjen tuaj. Le të vazhdojmë të ëndërrojmë, të shpërndajmë njohuri dhe të fuqizojmë rininë në 30 vitet e ardhshme dhe më tej, krah për krah!” thuhet në postimin e bërë nga Ambasada e SHBA në Tiranë.
Ndërkohë dy ditë më parë Kryebashkiaku i Vlorës, Dritan Leli, shkruante se është e rëndësishme që mirënjohja të kujtohet. “Është e rëndësishme që mirënjohja të kujtohet, jo vetëm në data të caktuara, dhe jam i sigurt që me marrëdhënien që kemi ndërtuar me Shtetet e Bashkuara të Amerikës, falenderimet nuk shkojnë vetëm në përvjetorë, si sot që bëhen 30 vite nga rivendosja e marrëdhënieve diplomatike.
Prej thuajse 20 vitesh, nga tre Këndet Amerikane që ndodhen në Shqipëri, njëri është në Vlorë, në bibliotekën e qytetit. Ambasada Amerikane kujdeset çdo vit ta pasurojë @AmericanCornerVlora me gjithë ç’u nevojitet të rinjve, për t’u zhvilluar në pikëpamjen kulturore dhe teknologjike, dy armë që koha kërkon t’i pasurosh çdo ditë. Çfarë më shumë se nxitja dhe krijimi i mundësive për t’u bërë profesionistë e të pavarur do t’iu duhej të rinjve? Vendi që na ka mësuar të ëndërrojmë, e ka mundësuar këtë hap të zhvillimit prandaj këto janë data që duhet t’i njohin të gjithë. Gëzuar përvjetorin” shkruante Leli.
Kujtojmë se së fundmi për Dritan Lelin, “ujërat” në politikë kanë qenë të trazuara, për shkak se ai u përjashtua nga radhët e Partisë Socialist për shkak se ai refuzoi të japë dorëheqjen për t’u kandiduar si deputet, kur mësoi se i ishte ofruar një pozicion jo i favorshëm në listë.
