Qytetarët shqiptarë që kanë shkelur afatin 90-ditor të qëndrimit në Greqi nuk do të penalizohen.Kryeministri Edi Rama deklaroi sot se ashtu siç e kishte deklaruar, është rënë dakord me homologun grek për të mos i penalizuar qytetarët shqiptarë, që për shkak të masave shtrënguese të ndërmarra në këtë situatë, kanë kaluar afatin 90-ditor të qëndrimit në Greqi.
“Më vjen shumë mirë që është realizuar zotimi që kam marrë para jush, që nuk do të gjobiten ata që kishin kaluar 90-ditëshin në Greqi dhe nuk janë gjobitur. Mund të ketë ndonjë rast sporadik, por masivisht nuk janë gjobitur. Ishte fjala e dhënë dhe e mbajtur nga miku im, kryeministri i Greqisë“, u shpreh Kryeministri.
Rama po ashtu informoi se autobusët e punonjësve sezonalë në Greqi kanë filluar të shkojnë. Kjo, sipas tij, bën të mundur që këta qytetarë të mos goditen në punën e tyre dhe në të ardhurat e tyre në këtë pjesë të kohës, kur ata punojnë në Greqi.
