Ish kryeministri, Ramush Haradinaj, i është përgjigjur kryeministrit Edi Rama, pasi ky i fundit deklaroi në emisionin “Opinion”, se do ta padisë për shpifje. Haradinaj u shpreh se respekton të drejtën e Ramës për të ndërmarrë këto veprime, por se ai ka vepruar në mënyrë legjitime për të mbrojtur tërësinë territoriale të Kosovës.
“Kam parë disa tituj në portalet në Kosovë, por nuk e kam parë intervistën. E kam shprehur qëndrimin tim lidhur me shkëmbimin e territoreve, që ka qenë një maskim për ndarjen e Kosovës, e cila do të sillte dëme ekonomike.
Këto qëndrime janë shqetësim legjitim i imi. Nuk kam koment për deklarime të tjera.
Ai [Rama] ka të drejtat e veta dhe i respektoj. Shqetësimi im ka qenë për projektin e ndarjes, i kam mbajtur ato qëndrime legjitime. Atdheu para së gjithash! Qëndrimi im është legjitim për të ekspozuar të gjithë ata që kanë përkrahur ndarjen“, u shpreh Ramush Haradinaj, në lidhje direkte me gazetaren Nisida Tufa të News24.
Kujtojmë se mbrëmjen e djeshme, Edi Rama paralajmëroi një padi ndaj Haradinajt, për deklaratën se 10 miliardë dollarë do të ndaheshin mes Ramës, Thaçit dhe Vuçiç, pas ndarjes së Kosovës.
Kjo do të ishte hera e parë, që një kryeministër shqiptar ndërmerr një hap të tillë, duke paditur një lider dhe ish kryeministër të Kosovës.
/TPZ.al/
