Regjizori Kastriot Çipi, mbrëmjen e djeshme ka vënë re detain se më 11 dhjetor, ditën e rënies së komunizmit në Shqipëri dhe lejimin e pluralizmit politik, televizioni Top Channel kishte të ftuar 4 komunistë, veteranë të Luftës Antifashiste Nacional Çlirimtare.
Nuk dihet nëse ka qenë thjesht rastësi apo televizioni i drejtuar nga Ben Blushi e ka bërë qëllimisht këtë gjë.
“Meqë ishte data 11 dhjetor, do të doja t’i pyesja këta veteranë, e sidomos atë kryetarin që e kishin rrahur fashistët italianë sepse e kishin kapur duke shpërndarë trakte:
A u vinte keq që Artur Kice u dënua nga komunistët shqiptarë, me 8 vjet burg, kur ishte 14 vjeç, sepse kishte shpërndarë trakte?” – shkruan Çipi në fund të postimit.
Postimi i plotë:
Sot, me rastin e rënies së komunizmit (11 dhjetor 1990) dhe lejimin e pluralizmit politik, televizioni i pavarur nga opozita, TCH, në emisionin e mbrëmjes “Soiree” kishte të ftuar… 4 komunistë, veteranë të Luftës Antifashiste Nacional Çlirimtare.
I pari rrëfeu se nuk kishte luftuar me pushkë, por kishte qenë korrier. Rrëfeu se një herë plumbi i kishte kaluar afër, kishte goditur një gur dhe ciflat e gurit i kishin gërvishtur ballin. Më vonë ky korrieri u bë sekretar i diktatorit Hoxha, ndërsa i biri është sot një nga armiqtë e betuar të Agron Tufës.
As i dyti nuk kishte luftuar me pushkë, por kishte shpërndarë trakte. E kishin kapur dy herë, ndërsa ngjiste trakte me brumë në mure. Një nga këto herë e kishin rrahur fashistët italianë. Pas lufte u bë prokuror. Sot është pensionist dhe kryetar i komitetit të veteranëve.
E treta kishte bërë agjitacion e propagandë në Vlorë, por nuk kishte dalë partizane, se “atë e vendosnin të tjerët”.
Ndërsa i katërti tha se kishte luftuar dhe madje ishte plagosur. Kishte thyer këmbën tek ish-qyteti i nxënësve gjatë luftës për çlirimin e Tiranës.
Meqë ishte data 11 dhjetor, do të doja t’i pyesja këta veteranë, e sidomos atë kryetarin që e kishin rrahur fashistët italianë sepse e kishin kapur duke shpërndarë trakte:
A u vinte keq që Artur Kice u dënua nga komunistët shqiptarë, me 8 vjet burg, kur ishte 14 vjeç, sepse kishte shpërndarë trakte?
