BELFAST, 16 dhjetor /ATSH-AFP/ – Pas rreth tre viteve pa qeveri lokale në Irlandën e Veriut, unionistët dhe republikanët, që ndajnë pushtetin, po përpiqen të rifillojnë dialogun me shpresë që rezultati i zgjedhjeve legjislative në Britaninë e Madhe të mundësojë zhbllokimin e situatës. Në këtë provincë britanike, qeverisja është e destinuar të jetë e ndarë mes unionistëve të DUP dhe republikanëve të Sinn Fein, ashtu siç është e përcaktuar në marrëveshjen e paqes të të Premtes së Shenjtë, që i dha fund në vitin 1998 dhunës 30-vjeçare në rajon. Por, Irlanda e Veriut po përballet me një pushim të ekzekutivit lokal që prej prishjes së koalicionit të mëparshëm në janar 2017 pas një skandali politiko-financiar. Që prej asaj kohe, disa raunde negociatash nuk kanë mundësuar heqjen e bllokimit, por pas zgjedhjeve në Britaninë e Madhe, konteksti politik ka ndryshuar, ashtu si dhe raportet e forcave politike duke i dhënë një impuls të ri diskutimeve të parashikuara sot. Deri tani, bisedimet nuk kanë qenë të lehta nga aleanca në vitin 2017 e DUP-it me Partinë Konservatore të ish-kryeministres, Theresa May, pa shumicë në Parlamentin britanik.
Atëherë, Partia Unioniste u përqendrua në Westminster duke ushtruar një influencë të madhe veçanërisht në negociatat për Brexit. Ajo bllokoi dy marrëveshje radhazi për daljen nga Bashkimi Europian duke kundërshtuar modalitetet që parashikonin shmangien e një rikthimi të një kufiri fizik mes Irlandës së Veriut dhe Republikës së Irlandës, anëtare e BE-së. Zgjedhjet legjislative në Britaninë e Madhe kanë ndryshuar plotësisht qëndrimin, fitorja e thellë e kryeministrit konservator, Boris Johnson e përjashton atë nga çdo aleancë për të realizuar Brexit-in më 31 janar. “Aspekti i vetëm pozitiv i fitores së Boris Johnson, është mundësia që DUP të heqë dorë nga të qenit i fiksuar nga melodrama që po ndodh në Westminster dhe të kthejë vëmendjen tek ajo që po ndodh këtu”, deklaroi shefi i Sinn Fein Mary Lou McDonald për televizionin irlandez./
