Autorët e dyshuar të plagosjes së avokatit Marjel Mejdi në Sarandë kërkojnë lirinë dhe pushimin e çështjes. Mësohet se një prej të akuzuarve, Aleks Rexha ka dorëzuar një kërkesë ditën e djeshme duke kërkuar revokimin e masës së sigurisë, arrest shtëpie që është vendosur ndaj tij nga Gjykata e Sarandës.
Në seancën e zhvilluar më datë 15 korrik të këtij viti, Prokuroria kishte kërkuar masën e arrestit me burg për 45 ditë.
Kërkesa e Aleks Rexhës do të shqyrtohet nga gjyqtari Fatmir Ndreu ndërkohë që mësohet se edhe një tjetër i pandehur për këtë ngjarje ka kërkuar zbutjen e masës arrest me burg të vendosur në mungesë.
Marjel Mejdi, avokat, ish-Drejtor ne Ministrine e Brendshme u plagos rëndë me sende të forta në 5 korrik në mes të ditës në rrugën pranë Portit Detar të Sarandës. Ai u mjekua ne Spitalin e Sarandës, më pas në atë të Janinës për shkak të gjendjes së rëndë dhe aktualisht ndodhet në rregjim shtrati në banesën e tij deri ne rehabilitim të thyerjeve në dorë e këmbë.
Nga shtrati i spitalit të Sarandës, ai ka dëshmuar për policinë, ku mësohet se ka thënë se shkak i sulmit është bërë një konflikt pronësie mes familjes se tij dhe disa personave të tjerë.
Ndërkohë bëhet me dije se disa kohë më parë avokatit i kanë rrahur edhe xhaxhain, shtetasin me iniciale I.Mejdi dhe djalin e hallës A.K., në dy ngjarje të ndryshme.
“Isha te lokali i portit, piva kafe me një shokun tim. Mora makinën për të dalë nga porti, m’u te dera, sa del, një Porsche e zezë më kishte zënë rrugën. Prita në makinë, që ta hapte rrugën. Ndërkohë, fraksion sekondi m’u sulën disa persona me hekura, shkopinj, sende të forta. Nuk i kisha parë asnjëherë këta persona. Më sulmuan, më gjuajtën në makinë njëherë.
Isha bashkë me një shok, u munduam të iknim që të shpëtonim, se ishin shumë veta. Nuk kishim çfarë të bënim. Më ndoqën nga mbrapa nja 30-40 metra. Më erdhi njëri, se unë ika në një moment, por ai më gjuajti në kokë dhe rashë në shesh. Nuk pushonin së gjuajturi. Me hekura, me shkopinj, nuk pushonin së gjuajturi. Unë qëndrova një orë brenda në lokal dhe nuk besoj të kenë qenë brenda ata, pasi aty ka policë, mund të më kenë ruajtur jashtë”, është shprehur avokati./Panorama/
