Skuadra e Selenicës sezonin e shkuar u shpall kampione e Kategorisë së Tretë,e kthyer me shumë bujë pas kaq shumë vitesh mungesë.Trajneri Duro bëri një punë të jashtëzakonshme teksa mori në dorë frerët e skuadrës,e në krye të saj e shtyu drejt suksesit,duke e ngjitur ekipin në Kategorinë e Dytë.U fol për projekte serioze,investime të cilat do ta barazonin Selenicën në nivel me ekipet e tjera,por asgjë nuk ka ndryshuar. Lojtarët nuk janë paguar në asnjë moment që prej fillimit të sezonit futbollistik,ku kanë luajtur dhe 5 ndeshje. Momentalisht Selenica renditet e fundit në Grupin B,ku nuk ka mundur të marrë asnjë pikë,kjo për arsyen se disa nga lojtarët u larguan nga skuadra për shkak të pagave.E njëjta situatë ndodhi dhe ndeshjen e fundit ku selenicarët zhvilluan takimin në Memaliaj,ku nuk u paraqit as trajneri vlonjat Erion Duro.
Skuadra shkoi e copëzuar,lojtarët e formacionit titullar nuk u paraqitën,teksa u luajt me lojtarë të rinj e pa eksperiencë duke humbur me shifrat e thella 8-1. Lojtarët së bashku me teknikun Duro pohojnë se nuk mund të vazhdojnë dot me këtë situatë.Skuadra shfuqizohet dita-ditës teksa lojtarët largohen një nga një pasi nuk ka një zgjidhje.Këta futbollistë me shumë pasion e kanë shoqëruar skuadrën deri në këtë moment,madje dhe duke i përballuar vetë të gjitha shpenzimet,por me sa duket është e pamundur të vijohet më tej.Nuk ka më motivim për këta djem që absolutisht duhet të cilësohen “heronj”.Bashkia e Selenicës nuk ka ende asnjë zgjidhje për skuadrën e cila vetëm pas pak ditësh pritet të luajë ndeshjen e parë në këtë qytet me shumë tradita për futbollin. Madje dhe vetë qytetarët shprehen të shqetësuar për skuadrën,ku pranojnë se ai është argëtimi i vetëm i fundjavave. Ky emër,”Selenica” kurrësesi nuk duhet të harrohet,por duhet të jetë i pranishëm e madje të zhvillohet akoma më shumë në futbollin shqiptar.
