Një biznesmen në Elbasan ka përfunduar në pranga pasi akuzohet se u ofronte qytetarëve ndërtime pa leje kundrejt parave. “Balkanweb” raporton se në pranga ra 44-vjeçari Sulejman Shahini, pronar i një firme ndërtimi në Elbasan. Biznesmeni u arrestua nga seksioni i krimeve në komisariatin e Policisë Elbasan.
Prej 6 muajsh policia e kishte nën hetim me metoda speciale dhe zbuloi se ky shtetas në emër të firmës së ndërtimit që kishte prej vitesh në Elbasan u premtonte pronarëve të bizneseve ndërtimin pa leje të objekteve apo qytetarëve që kërkonin të ndërtonin shtëpi pa leje ndërtimi. Sipas burimeve, 44-vjeçari Shahini kishte lidhje të forta edhe me zyrtarë të INUV në Bashkinë e Elbasanit nëpërmjet të cilëve u premtonte qytetarëve ndërtimin e banesave apo bizneseve pa leje kundrejt shumave që variojnë nga 3 mijë deri në 5 mijë euro.
Shahini akuzohet për veprën penale “ndërtim i pa ligjshëm”, “dhënie ndihme për ndërtim të pa ligjshëm” dhe “fshehje e të të ardhurave”.
