Kosova po përballet me një fushatë të egër të Serbisë në politikën e jashtme, e sidomos në aspektin e anëtarësimit në organizata ndërkombëtare.
Liberalizimi i vizave, transformimi i FSK-së në Ushtri si dhe anëtarësimi në INTERPOL, janë tri proceset kryesore në të cilat Kosova përveç presionit të Serbisë, po përballet edhe me mosgatishmërinë e Bashkimit Evropian, shkruan lajmi.net.
Së fundmi, sekretari i përgjithshëm i NATO-s, Jens Stoltenberg, tha se Kosova mund të përballet me pasoja nëse ngutet me formimin e Ushtrisë. Sipas tij, tani nuk është koha e duhur për këtë proces.
Kjo deklaratë nuk kaloi pa reagime edhe në Kosovë. Nga ministria e FSK-së, për lajmi.net thanë se Kosova ka të drejtë të marrë vendime të cilat i konsideron se janë të nevojshme.
Sipas këtyre të fundit, kjo nuk ndikon aspak negativisht për Kosovën.
Përveç me ushtrinë, liberalizimi i vizave po konsiderohet si premtim i pa përmbushur i Bashkimit Evropian.
Madje, në vizitën e fundit të komisionerit Hahn në Kosovë, u tha se Kosovës i duhet të presë deri në vitin 2020 për heqjen e vizave.
Këtë po e thotë edhe vetë ministrja e Integrimeve Evropiane, Dhurata Hoxha.
“Nuk ka interesim nga BE-ja dhe nga vendet anëtare që t’i mbajnë premtimet e veta dhe kjo situatë po ndëshkon qytetarët e vendit tonë”, deklaroi Hoxha.
Një situatë e tillë vjen pas votimit pro të këtij procesi në Komisionin LIBE dhe në Parlamentin Evropian, si dhe pas bindjeve të zyrtarëve kosovarë se e njëjta do të jetë pikë edhe në Këshillin e Ministrave.
Kosova me fushatë të egër dhe me mos reagim nga BE-ja u përball edhe në procesin e anëtarësimit në INTERPOL.
Në atë që nga mediat e Beogradit u quajt si fitore e madhe e Serbisë, Kosova nuk arriti t’i sigurojë votat për anëtarësim në familjen botërore të Policisë.
Menjëherë pas kësaj, nga Qeveria e Kosovës u tha se vendi u përball me presion të jashtëzakonshëm dhe propagandë të shtetit serb në politikën e jashtme.
Të njëjta arsye u dhanë edhe nga akterë tjerë institucionalë shtetëror.
Ndryshe nga këto tri procese jetike për Kosovën, Bashkimi Evropian nuk u tregua aq pasiv në vendimet reciproke që Kosova i mori ndaj Serbisë.
Vënia e taksës 100 për qind ndaj produkteve me prejardhje nga Serbia dhe Bosnja, alarmoi krerët evropianë.
E ashpër u tregua edhe përfaqësuesja e lartë e BE-së, Federica Mogherini, e cila kërkoi heqjen e menjëhershme të taksës.
Nga zyrtarë të Qeverisë së Kosovës kjo ishte nënkuptuar si qasje e njëanshme e BE-së.
Madje, shefi i kabinetit të kryeministrit Haradinaj, Avni Arifi kishte thënë se kjo qasje ka sjellur dështimin e plotë të dialogut.
Do të dëshiroja që Mogherini dhe ekipi i saj të ishin të mobilizuar për implementimin e marrëveshjes për energji ashtu siç janë mobilizuar për hjekjen e taksës 100%. Befasuese të shohësh tërë këtë dinamikë, tërë këtë emocion në mbrojtje të interesave serbe. Fatkeqësishtë, kjo qasje e njëanshme solli të dështimi i plotë i dialogut”, kishte shkruar Arifi në llogarinë e vet në “Facebook”.
E megjithë presionet, Qeveria po duket stoike në vendimin e saj për taksë.
Këtë e tha gjatë ditës së djeshme edhe kryeministri Haradinaj pas mbledhjes së Qeverisë.
Vendimin në fjalë ai e quajti legjitim dhe mbrojtje të sovranitetit të Kosovës.
