Ditën e djeshme u luajt ndeshja hapëse e javës së 15-të, të Kategorisë Superiore, ajo mes Partizanit dhe Tiranës, ku bardheblutë fituan me rezultatin 1-2. Ndërkohë ditën e sotme luhen katër takime të cilat mbyllin këtë javë të kampionatit.
Në orën 13:00 luhen dy takime, ato mes Flamurtarit dhe Bylisit dhe Laçi ndaj Luftëtarit të Gjirokastrës. Ballshiotët me anë të një fitoreje ndaj Flamurtarit të vendit të fundit, mund të marrin dhe kryesimin e tabelës së klasifikimit, qoftë edhe përkohësisht.
Ndërsa në orën 16:00, luhet një tjetër ndeshje e madhe e javës, ajo mes Kukësit dhe Teutës. Verilindorët aktualisht ndodhen në vendin e dytë me 24 pikë, ndërsa durrsakët kanë 2 pikë më pak dhe renditen të gjashtët. Gjithashtu në orën 16:00, zhvillohet ndeshja mes Skënderbeut dhe Vllaznisë.
