Të kapur dorë për dore, aktorja Luiza Xhuvani së bashku me vajzën dhe djalin Kostandin Xhuvani i dhanë lamtumirën bashkëshortit dhe babait të tyre, Gjergj Xhuvani. Regjisori, skenaristi dhe producenti shqiptar, Gjergj Xhuvani, u përcoll të martën (20 gusht 2019) në banesën e fundit. Familjarët vendosën që ceremonia mortore të ishte private, ndërsa kolegët thanë se arti humbi një ndër regjisorët më të mirë.
Djali i regjisorit, Kostandin Xhuvani, u shoqërua gjatë gjithë kohës në ceremoni nga policë. Ai siguroi lejen nga Drejtoria e Burgjeve për të marrë pjesë në ceremoninë e varrimit.
Në heshtje përcollën ngushëllimet edhe miqtë e tij të ngushtë, edhe pse kishin shumë për të thënë për një regjisor e njeri të rrallë si Xhuvani. Gjergj Xhuvani, humbi betejën me sëmundjen e rëndë që e mundonte prej vitesh, një javë më parë në Romë, në moshën 56 vjeç. Por pavarësisht gjendjes shëndetësore ai po punonte për të sjellë projektin e tij të fundit, filmin “Liqeni im”.
