Kreu i Urgjencës Kombëtare Skënder Brataj, gjatë fjalës së tij të mbajtur në mbledhjen Komitetit të Ekspertëve ditën e sotme u shpreh në lidhje me aludimet se shërbimi po u jepet pacientëve në ambulanca për shkak të tejmbushjes së kapaciteteve në spitalet Covid. Brataj u shpreh se rrjeti i ambulancave funksionon normalisht dhe pacientëve të shtruar në to nuk u mungon asgjë, pasi janë kthyer në mini-spitale. Sipas tij ndihmat e ardhura nga BE dhe shtimi i ambulancave të reja ka bërë që rrjeti i urgjencës të funksionojë normalisht.
“Nuk është puna se ju shikoni njerëzit brenda në ambulancë dhe ata janë të braktisur. Askush nuk është braktisur. Ato ambulanca ku njerëzit janë brenda, kanë gjithçka që duhet. Asgjë nuk u mungon. Sapo mbaron oksigjeni, u vihen në dispozicion një tjetër.
Kemi situatën në kontroll.Ka pasë raste që ka përfunduar oksigjeni i ambulancës dhe është bërë menjëherë mbushja e tyre. Kërkesa e urgjencës ishte dhe pajisja me ambulanca të reja të cilat me ndihmën edhe të BE-së janë shtuar. Jemi në përputhje me gjithë strategjinë e menaxhimit të pandemisë dhe rrjeti i ambulancave funksionon normalisht”, u shpreh Brataj.
