Policia e Tiranës ka goditur një grup që dyshohet se trafikonte armë dhe lëndë eksplozive nga Kosova drejt Shqipërisë.
Uniformat blu mësohet se kanë ushtruar kontrolle në Kamzë dhe në një godinë në Bathore ku janë sekuestruar 40 kilogramë lëndë eksplozive
Gjatë aksionit, ku kanë marrë pjesë RENA dhe Forcat e Sigurisë Kombëtare, janë ndaluar tre persona.
Mes personave që janë vendosur në pranga nga blutë mësohet se ka edhe shtetas nga Kosova.
Deklarata e policisë:
Seksioni për Hetimin e Trafiqeve të Paligjshme, i DVP Tiranë, pas një pune hetimore 4-mujore, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, duke përdorur metoda speciale të hetimit, bëri të mundur goditjen e një grupi kriminal nga Kosova, që kryente trafikim armësh dhe lëndësh eksplozive nga Kosova në drejtim të Shqipërisë.
Si rezultat i mirorganizmit të punës në kuadër të operacionit policor të koduar “THE SAME”, më datë 04.02.2024, në afërsi të urës së Gjolës u bë arrestimi në flagrancë i shtetasve:
R. M., 20 vjeç, L. P., 25 vjeç dhe Sh. H., 27 vjeç, të tre banues në Gjilan.
Në kuadër të këtij hetimi, u shpallën në kërkim edhe 2 shtetas kosovarë.
Gjithashtu, gjatë operacionit u sekuestruan 203 kallëpe me lëndë plasëse të dyshuar tritol TNT, me peshë 46 kg. Kjo sasi ishte destinuar për t’u përdorur nga grupe kriminale të ndryshme, në territorin e Republikës së Shqipërisë.
Në kuadër të këtij procedimi janë sekuestruar edhe 3 celularë dhe 1 automjet.
Më parë, në kuadër të këtij procedimi janë zhvilluar 2 operacione, janë vënë në pranga 2 shtetas dhe janë sekuestruar 4 armë zjarri pistoleta, së bashku me krehra dhe municione luftarake, të cilat janë trafikuar nga Kosova në drejtim të Shqipërisë.
