Rezart Prifti, ekspert ekonomie, ka treguar që çuan në largimin e tij nga Nisma “Thurje”, e cila në zgjedhjet e ardhshme, pritet që të garojë për të fituar mandate në Kuvend. Sipas priftit kjo forcë ishte duke vepruar me mendësi të tjetër, dhe për këtë shkak ai nuk e gjente më me vend që të qendronte aty. “Unë tentova të bashkoja Nismën me disa lëvizje të tjera, por gjatë rrugës i urova suksese Nismës, për arsye sepse unë nuk dua të operoj në mënyra të vjetra, të mendoj në mënyra të vjetra dhe të merrem me mendësi të vjetra. Unë u tërhoqa sepse nuk mund të pretendoj të bëj të renë me metoda të vjetra. Nuk duroj dot fushata si në vitin 1993, me dërgim kutish tek të përmbyturit, me mungesë diskutimesh dhe transparence”, tha Prifti në a2.
Më tej, Prifti komentoi edhe rritjen e pagave: “Është manovër tipike politike dhe nuk ka lidhje as me mësuesit dhe as me doktorët. Unë kam qenë kundër nismës së rritjes së pagave në këtë periudhë. Nëse targeton shëndetësinë, duhet t’u kishe dhënë shpërblime për punën jashtë orarit, t’u kishe dhënë pajisjet e duhura. Doktori i nderuar shkoi në Turqi për t’u kuruar, me shpenzimet e veta. Sot, doktorët janë bërë për psikolog. Dëshira më e madhe e doktorëve sot është që të fikin celularët 24 orë”.
Në lidhje me premtimin për 300 000 vende të reja pune, Prifti u shpreh: “Qeveria, ngaqë nuk ka oponencë, merr guximin që t’u thotë të tjerëve “verifikojini ju” premtimet tona. Nuk ka asnjë lloj institucioni që mbështet se ka 300 000 të punësuar. Rritja e numrit të të punësuarve nuk korrespondon me rritjen e pagesave të sigurimeve shëndetësore dhe shoqërore. Në shtet është një mejhane e madhe, ta them me siguri absolute. Nuk dihet nga hyhet e nuk dihet nga dilet. Në kohë fushate, justifikohen të gjitha veprimet, edhe të atyre njerëzve të mirë në shtet. Motoja e tyre është “ruaj kokën, të bëjmë ndonjë lek e të ikim”.
