Shqipëria si destinacion europian i cili ka shumë për t’u zbuluar dhe për t’u eksploruar, vazhdon të tërheqë vëmendjen e agjencive dhe web-siteve të huaja.
Vendi i shqiponjave po promovohet kudo në botë si një thesar që pret për t’u zbuluar dhe promovimi i saj edhe nga turistët e huaj ka bërë që vendi ynë të jetë në axhendën e vendeve turistike mjaft të pëlqyera, e cila ofron një turizëm gjithëvjetor dhe të larmishëm.
Së fundmi një prej portaleve të njohura britanike, UNILAD ka shpërndarë një video duke treguar vendet më të bukura të Shqipërisë nga liqenet, deti dhe deri tek malet si një vend turistik plot ngjyra dhe mjaft i bukur ku ndërthuret gjelbërimi dhe natyra e qetë me majat e thepisura me bukuri të egër.
Ministri i Turizmit dhe Mjedisit Blendi Klosi është shprehur se,”kjo video e një prej portaleve të njohura britanike, UNILAD vlerëson bukuritë natyrore të Shqipërisë dhe fton turistët ta vizitojnë vendin tonë”.
Shqipëria tashmë është kthyer në një thesar vlerash dhe po ekplorohet përherë e më shumë nga turistët aventurier që vizitojnë çdo cep të vendit tonë duke ndërthurur argëtimin me bukuritë natyrore.
