Procesi i vaksinimit anti-covid ka nisur edhe për bluzat e bardha në Fier, ndërkohë që kryeministri Edi Rama tha se brenda marsit do të mbyllet vaksinimi për të gjitha bluzat e bardha. ”Të dielën fillojmë dhe me kategorinë 80 plus. Të mbarojmë me bluzat e bardha dhe me shtëpitë e të moshuarve. Janë mërzitur disa se kur folëm për personalitete kemi qënë qartësisht sipas planit dhe flitet për disa personalitete që janë e asaj kategorie”,-tha Rama.
Kurse ministrja e Shëndetësisë, Ogerta Manastirliu, tha se deri më tani janë vaksinuar 3 mijë mjekë. ”Në të gjithë fushata vaksinimi në botë ndodh kjo, që i bind të tjerët, prandaj quhet fushatë vaksinimi”.
Shefja e Programit Kombëtar të Vaksinimit Erida Nelaj, deklaroi se deri tani janë bërë mbi 3 mijë vaksinime anti-covid në të tre qendrat e vaksinimit në Tiranë, Shkodër Dhe Vlorë si dhe në shtëpitë e të moshuarve dhe stafin e tyre të kujdesit. Nelaj thekson se janë bërë 2400 dozat e para dhe kemi rreth 640 persona që tashmë i kanë marrë të dyja dozat.
”Aktualisht janë siguruar doza për 800 mijë persona, me dy doza, kjo duke iu referuar 500 mijë dozave të Pfizer dhe gati 1 milion e 114 mijë të AstraZeneca-s që janë të siguruara nëpërmjet Covax”. Ajo theksoi se sa herë të kemi sasi vaksinash, do të zbritet në grupmosha.
