Më në fund thyhet Bayern Munchen. Ekipi bavarez doli pa pikë nga transferta me Hoffenheim, takim që e humbi me rezultatin 4-1. Vendasit zhbllokuan takimin në minutën e 16-të falë golit me kokë të mbrojtësit Bicakcic.
Tetë minuta më vonë erdhi edhe dyfishimi. Izraeliti Munas Dabbur realizoi një gol shumë të bukur, duke mposhtur Neuer me një “panenka”. Djemtë e Flick, të cilët fituan Superkupën e Evropës të enjten (mposhtën 2-1 Sevillan), gjetën golin në fundin e pjesës së parë.
Eurogol i Joshua Kimmich dhe të gjithë menduan se pjesa e dytë do të sillte përmbysjen. Diçka e tillë nuk ndodhi, Hoffenheim ishte në një ditë fantastike dhe shënoi dy gola të tjerë me anë të Andrej Kramaric.
Dygolësh i sulmuesit kroat në 13 minutat e fundit të sfidës dhe 4-1 për vendasit. Bayerni ishte vetëm një fitore larg barazimit të rekordit të Coritibas. Brazilianët kanë siguruar 24 fitore radhazi në të gjithë kompeticionet, ndërsa bavarezët u frenuan në shifrën 23. Bundesliga, java e dytë
Hoffenheim-Bayern Munchen 4-1
(Bicakcic 16′, Dabbur 24′, Kramaric 77′, (pen) 90+2′ / Kimmich 36′)
