Kryeministri Edi Rama pritet të zhvillojë një takim me naftëtarët e Ballshit, në orën 18:00 të pasdites së sotme. Takimi është organizuar të mbahet në ambientet e Bashkisë së Fierit, ku kryeministri do të takohet me një përfaqësi prej 8 personash të deleguar nga naftëtarët.
Pjesë e përfaqësisë së punonjësve të Rafinerisë së Naftës në Ballsh janë disa prej grave greviste si dhe kreu i sindikatës së naftëtarëve, Sokol Dautaj. Policia e Shtetit ka blinduar qytetin e Fierit, ku vërehen pika të FNSH-së në çdo aks rrugor.
Kujtojmë se takimi i sotëm mes kryeministrit dhe naftëtarëve vjen pas përfundimit të grevës së urisë së grave punonjëse të Rafinerisë në Ballsh. Prej kohësh përmes disa protestave dhe grevës së urisë naftëtarët kërkojnë zgjidhje për marrjen e pagave të prapambetura, si dhe rikthimin e tyre në punë me kontrata individuale.
