Ministria e Infrastrukturës dhe Energjisë informon se është vënë në operim linja 110kV Kombinat-Selitë, një investim i lënë përgjysëm në vitin 2011 dhe i përfunduar tashmë nga Operatori i Sistemit të Transmetimit.
“Pas ndërtimit të nënstacionit të ri 110 kV të Kombinatit, starton projekti tejet i rëndësishëm i ndërtimit të linjave kabllore në kryeqytet si dhe ndërtimi i nënstacionit të ri 400kV Tirana 3, që do të garantojë furnizim të sigurt me energji elektrike për të gjithë banorët e kryeqytetit dhe do t’i hapë rrugë zhvillimit urban nëpër zona ku deri tani linjat ajrore e kanë penguar atë”, thuhet në deklaratën e MIE-s.
Sipas MIE-s, OST së shpejti nis heqjen e linjave ajrore, shtyllave dhe përcjellësave të ndërtuara shumë vite më parë, të cilat kalojnë në afërsi të banesave dhe bizneseve, duke eleminuar kështu çdo rrezik që cënon sigurinë e jetesës së qytetarëve, por njëkohësisht duke shmangur edhe një pengesë për legalizimin e këtyre objekteve.