Më shumë se 70 persona janë marrë në pyetje nga Prokuroria e Durrësit në kuadër të hetimeve për dëmet e shkaktuara nga tërmeti i 26 nëntorit. Një verifikim i veçantë po bëhet për objektin e kavalishencës ku humbi jetën kryekomisari Bajram Hajdarmetaj, ndërkohë që godina duhej boshatisur që pas tërmetit të 21 shtatorit. Në hetim janë përfshirë edhe 770 objekte të dëmtuara në Tiranë.
Më shumë se 70 persona janë marrë në pyetje nga Prokuroria e Durrësit në lidhje me hetimet për dëmet e shkaktuara nga tërmeti i 26 nëntorit. Pas hartimit të listës me 60 kompani hetimi nën hetim, prokurorët kanë kërkuar shpjegime nga inxhinierë, arkitektë dhe urbanistë që kanë pasur të bëjnë me objektet e shembura veçanërisht rastet kur ka pasur viktima. Një drejtim i veçantë i hetimit është edhe gjendja e objektit ku humbi jetën kryekomisari Barjam Hajdarmetaj, pasi nga inspektimi i kryer pas tërmetit të 21 shtatorit, ndërtesa u përcaktua për ndërhyrje urgjente në muraturë.
Fatkeqësisht shqetësimi i grupit të inspektimit, që nuk u mor parasysh në kohë, i mori jetën kryekomisarit, pasi një pjesë e godinës u shemb për shkak të tërmetit të dytë në 26 nëntor. Por në godinën numër 5, natën e 26 nëntorit kanë qenë edhe studentë të Akademisë së Policisë dhe trajnerë, që fatmirësisht nuk kanë pësuar dëmtime.
Ndërkohë në Tiranë nga prokuroria ka nisur hetimi për 770 objekte të dëmtuara nga tërmeti i 26 nëntorit, ndonëse ende ka problematika për sa i përket inspektimeve nga ana e policisë në objektet e dëmtuara.
Referuar listës së policisë, një banesë në Kombinat e cila nuk është inspektuar ende nga policia është përcaktuar nga IKMT për tu shembur. Në Kavajë 16 banesa të ndërtuara para viteve ’90 ende nuk janë inspektuar, ndërkohë që ende nuk ka një vendim për prishjen e tyre.
Inspektimet në terren kanë zbuluar se në zonën e Kamzës 54 banesa në proces legalizimi janë të pabanuara, ndërsa për to nuk dihet viti i ndërtimit, as ndërtuesi. E njëjta situatë paraqitet edhe në zonën e Kombinatit, ku për 27 banesa nuk dihet viti i ndërtimit, as ndërtuesi dhe nëse janë apo jo në proces legalizimi.
Tërmeti, inspektimet e Policisë në Tiranë
-54 banesa të pabanuara, pa vit ndërtimi, pa ndërtues, proces legalizimi në Kamëz
-16 banesa të pa inspektuara në Kavajë
-Kombinat, 1 banesë për prishje pa verifikime
