Vlorë/ Arrestohet 38-vjeçari i kërkuar nga Italia, dënuar me mbi 7 vite burg për drogë dhe zhvatje
Një 38-vjeçar i shpallur në kërkim ndërkombëtar nga autoritetet italiane është arrestuar në Vlorë, në kuadër të operacionit policor të koduar “Target 1”. Ai pritet të ekstradohet drejt Italisë, ku është dënuar me mbi 7 vite burg për një sërë veprash penale.
Në pranga ka rënë Skerdi Mehmetaj, alias “Piperi”, banues në Selenicë të Vlorës. Sipas policisë, Gjykata e Apelit në Bolonjë e ka dënuar me 7 vite, 3 muaj e 15 ditë burgim për prodhim dhe shitje të lëndëve narkotike, zhvatje dhe tentativë zhvatjeje në bashkëpunim, si dhe për përdorim të mjeteve zjarrvënëse, përfshirë koktejet Molotov, në zonën e Riminit.
Ndaj tij rëndojnë gjithashtu dënime për falsifikim dokumentesh identifikimi, rikthim të paligjshëm në Itali dhe mbajtje të armëve pa leje.
Veprimtaritë kriminale dyshohet se janë kryer gjatë periudhës 1 shkurt 2015 – 12 shkurt 2020. Nga dënimi i përgjithshëm, Mehmetaj ka ende për të vuajtur 6 vite, 4 muaj e 3 ditë burg.
Ndërkohë, 38-vjeçari është përfshirë edhe në një tjetër ngjarje në Vlorë, ku më herët është vetëplagosur me armë zjarri në këmbë, në zonën e Lungomares.
