Zyrtari i DASH ka mbërritur në selinë e Kuvendit ku do të takohet me kreun e Kuvendit Gramoz Ruçi. Ai shqoërohet edhe e ngarkuara me punë e SHBA në Shqipëri Leyla Mose-Ones.
David Konstelancik zyrtari i DASH i cili ndodhet për një vizitë në vendin tonë do të ketë ditën e sotme disa takime me përfaqësues të mazhorancës dhe opozitës joparlamentare.
Në orën 11:00 ai do të pritet nga kryeparlamentari Gramoz Ruçi ndërkohë që në orët e pasdite do të ketë takime me liderët e opozitës, fillimisht me krydemokratin Lulzim Basha në orën 14:00 e më pas me kryetaren e LSI Monika Kryemadhi në orën 15:30.
Në orën 17:00 Konstelancik do të takohet me kreun e qeverisë Edi Rama në kryeministri.
Diplomati i karrierës Kostelancik gjatë vizitës në Shqipëri dhe takimeve me liderët e partive kryesore opozitare pritet që të kërkojë normalizimin e situatës me qëllim uljen e palëve në dialog për të kapërcyer ngërçin, që mund të ndikojë edhe në vendimin për hapjen e negociatave në mes të Tetorit.
E ndërsa dy vite më parë ishte Hoyt Brian Yee, ish-zyrtar i lartë i DASH-it që arriti që të zgjidhte krizën, tashmë mbetet për t’u parë nëse Kostelancik, që herët ka qenë edhe pjesë e stafit të ambasadës së SHBA-së në Tiranë do të arrijë që të ketë sukses në përpjekjen e tij.
David Kostelancik ka qenë zëvendës ambasador i SHBA në Hungari, ndërsa ka mbuluar edhe marrëdhëniet me Rusinë në Departamentin Amerikan të Shtetit, teksa edhe çështja e influencës së Moskës në Ballkan mund të jetë pjesë e diskutimeve.
