Nga Saranda, kryetari i PD-së Lulzim Basha ka deklaruar se 30 qershori është i paligjshëm e për rrjedhojë të gjithë kryebashkikët e dalë prej votimeve të një muaji më parë janë nul dhe antikushtetues. Basha u shpreh para simpatizantëve të PD-së se opozita është e vendosur t’i shkojë deri në fund betejës për zgjedhje të parakohshme dhe një qeveri tranzitore.
Basha: “30 qershori vetëm sa vërtetoi edhe njëherë se me Edi Ramën s’mund të ketë një proces normal zgjedhor. Natyrisht që 30 qershori është nul, është nul nga ana kushtetuese. Me 10 qershor, i vetmi institucion që dekreton zgjedhjet, Presidenti i Republikës, e anuloi si datë, caktoi një datë tjetër. I vetmi institucion që mund ta gjykojë është Gjykata Kushtetuese. Ndaj 30 qershori është nul. Nuk ka prodhuar dhe s’mund të prodhojë asnjë rezultat të ligjshëm.
Vendosmëri të plotë dhe me qartësi për objektivin që kemi përcaktuar: zgjedhje të parakohshme parlamentare, në një ditë me zgjedhje kushtetuese lokale, me një qeveri tranzitore, pa Edi Ramën kryeministër. Dhe me nxjerrjen para drejtësisë, të të gjithë personave që janë kapur duke vjedhur zgjedhjet e shqiptarëve, siç e kanë mësuar tashmë gjithë bota.
