Kryeministri Edi Rama dhe Ministrja e Shëndetësisë dhe Mbrojtjes Sociale, Ogerta Manastirliu kanë zhvilluar një takim me task-forcën anti-covid të ngritur për inspektimin e respektimit të masave të vendosura për kufizimin e përhapjes së Covid19. Gjatë fjalës së tij kryeministri u ndal edhe tek komentet e liderit të opozitës Lulzim Basha. Rama theksoi se sot sipas tij spitalet nuk kanë problem kapacitetesh ashtu sikundër është thënë.
Pjesë nga fjala e kryeministrit Edi Rama: “Del ky tjetri, se si Coli me Lolin, “kapacitetet janë ezauruar, spitalet janë tejmbushur, njerëzit po lihen rrugëve”, Ca janë këto? Ca janë këto? Këto janë skandale morale të pagëlltitshme se sot ne jemi absolutisht të përgatitur për më të keqen por duam që ta mbajmë larg.
Sot ne s’kemi problem kapacitetesh se në dy spitalet COVID kemi 1/4 bosh por ritmi i numrit të të infektuarve tregon që mund të mbushen në një kohë të shkurtër. Ky është çelësi e s’duam të na i marrë çelësin armiku i padukshëm. Janë dy spitale të tjera gati për tu hapur nëse do jetë nevoja, por edhe nëse ato dy të tjerat do mbushen, uroj jo, ka të tjera në radhë që janë gati. Një sistem i tërë është gati, por kjo s’do të thotë që ne mund të luajmë. Vetëm sot instalohen në sistem 60 respiratorë plus.
