Kombëtarja Shqiptare e Futbollit të femrave do të presë nesër në “Elbasan Arena” skuadrën e Finlandës, në sfidën e vlefshme për eliminatoret e “Euro 2021” në Grupin E. Vajzat shqiptare shpresojnë të përsërisin suksesin e Kombëtares së meshkujve pak vite më parë, edhe pse nuk do të jetë aspak e lehtë, duke qenë se në grup kanë përballë ekipe si Portugalia, Skocia, Qipro dhe Finlanda.
Për të parë më nga afër gjendjen e skuadrës, tekniku Vioresin Sinani ka zhvilluar një ndeshje miqësore me një ekip meshkujsh. Bëhet fjalë për Pepa U-17, një skuadër që merr pjesë në Superligë për këtë grup-moshë. Ka qenë një ndeshje që nuk ka pasur histori, pasi djemtë që drejtohen nga Mardian Kacollja kanë dominuar në çdo aspekt, duke fituar 3-0, me golat që u shënuan që në pjesën e parë. Sigurisht, edhe pse një ekip kombëtar, përballë një skuadre meshkujsh, femrat e kanë pasur të pamundur të rivalizonin.
Tashmë e gjithë vëmendja e vajzave kuqezi do të jetë te sfida ndaj nordikeve, ku do të kërkohet një nisje sa më pozitive e ndeshjeve eliminatore. Kujtojmë se takimi i nesërm ndaj Finlandës starton në orën 17:00 dhe hyrja do të jetë pa pagesë.
