Kafeneja më e bukur në botë ndodhet në kryeqytetin e Hungarisë, Budapestin. Dekorimi me stilin e Rilindasve italianë e me abazhurë që varen nga tavanet e lartë, të duket sikur ke udhëtuar në kohë. Kafeneja është quajtur Nju Jork dhe është nga më të vjetrat në qytet me një moshë 125-vjeçare. Në këtë vend njerëzit futen për më shumë se thjesht një kafe a një ëmbëlsirë, por shumë më shumë. Ndërtesa ndodhet në bulevardin kryesor të qytetit dhe pret rreh 2 mijë klientë në ditët më të ngarkuara. Emri i është vënë që në vitin 1894, kur kompania e sigurimeve “New York Life Insurance” hapi një degë në qytet dhe vendosi që tek selia të hapet një kafene. Edhe pse kafeja u soll në Hungari, gjatë pushtimit osman, kultura e kafeneve u krijua vetëm pas formimit të Austro-Hungarisë. Në këtë periudhë në Budapest janë hapur rreth 500 kafene të reja.
