Dorina është një vajzë që ka sjellë nënën e saj në “Shihemi në Gjyq”. Në insertin prezantues të rubrikës së “E Diela Shqiptare” në Tv Klan, ajo thotë se është neglizhuar nga prindërit gjatë gjithë jetës së saj.
Dorina: Unë jam fëmija i dy prindërve të cilët më kanë neglizhuar tërë jetën! dua të di nga nëna ime, pse, pse tek unë? Çfarë i kam bërë? Si do jetë fati im, jam e vetme, jam mes katër rrugëve?
Pasi hyn në studio, Dorina shpjegon situatën e saj të rëndë shëndetësore. Ajo ka lindur me një lloj të rrallë kanceri në shtyllën kurrizore që i ka shkaktuar probleme të njëpasnjëshme.
Dorina: Jam shumë e emocionuar, ndihem e emocionuar dhe e indinjuar për gjithçka kam kaluar në jetën time.
Ardit Gjebrea: Çfarë ke kaluar në jetën tënde?
Dorina: Unë kam lindur me një nga tipet më të rënda të kancerit të shtyllës kurrizore. Dhe sikur kjo të mos mjaftonte, kam kaluar 10 operacione.
Ardit Gjebrea: Ke lindur kështu?
Dorina: Unë kam lindur me kancer në shtyllën kurrizore.
Ardit Gjebrea: Dhe kur është diagnostikuar, verifikuar dhe më pas kuruar, në çfarë moshe?
Dorina: Unë jam operuar në moshën 3-vjeçare për problemet që kisha që vinin nga kjo sëmundje dhe më pas në moshën 9 vjeç, 16 vjeç dhe deri para një viti.
Ardit Gjebrea: Vazhdon, ke vazhduar gjithë kohën me operacione, me ndërhyrje…
Dorina: Me operacione, vuajtje të papara! 4 vjet kam ndenjur me tuba në bark.
Ardit Gjebrea: Dhe ankohesh për prindërit?
Dorina: Po!/tvklan.al
Nashiferi është nëna që është sjellë në “Shihemi në Gjyq” nga vajza e saj, Dorina. Ajo shfaqet e ngashëryer në insertin prezantues të rubrikës së “E Diela Shqiptare” në Tv Klan dhe mes dhimbjes, thotë se është një hallexhie.
Përveç vajzës, Dorinës e cila është e sëmurë me kancer në shtyllën kurrizore, bashkëshorti i Nashiferit është i paralizuar prej 25 vjetësh.
Nashifer: Nëna nuk është për televizione! Nëna jam me 100 halle! Nëna jetoj me një burrë të paralizuar që i shërbej prej 25 vjetësh. Nëna nuk është për të zgjidhur halle. Unë jam një hallexhie që të më ndihmojnë t’i zgjidh hallet.
Ardit Gjebrea: Paske edhe babain me probleme?
Dorina: Po, babai im ka 30 vjet i paralizuar.
Ardit Gjebrea: Me sa po shoh, hallet i paskan rënë…
Dorina: Unë zoti Ardit, kam qenë jetime me prindër gjallë!
Nashiferi hyn në studio e përlotur dhe e revoltuar ndaj faktit që Dorina e ka sjellë në seancën e ndërmjetësimit.
Nashifer: Ti ke sjellë nënën tënde këtu? Më solle në gjyq para të gjithë shqiptarëve? Të më shohë e gjithë bota, të më gjykojë mua? Si ka mundësi Dorina?/tvklan.al
