Kryeministri Edi Rama, i ftuar në emisionin “Dritare me Rudinën”, ka folur për ligjin që pritet të kalojë në Kuvend, që parashikon mbylljen e pikave të basteve dhe kazinove.
Sipas tij, “Kjo ka qenë një përpjekje e nisur më parë e cila u materializua në një tentativë në parlament për kazinotë elektronike. Në atë kohë nuk u diskutua për bastet por kazinotë elektronike. Atë kohë dështoi. Nuk u fut menjëherë por sot e ka. Ka pasur disa interpretime për këtë jo do ikin nga qendra do shkojnë në periferi. Do mbyllen të gjitha dhe do ketë të tilla vetëm në zona turistike dhe në hotele me 5 yje. Do ikin nga kudo. Është një mortje që është kudo”.
Më tej i pyetur lidhur me monopolin që pretendohet të krijohet online, tha se edhe ky monopol do të mbyllej me 31 dhjetor, ndërsa shtoi se po punohet për mbylljen edhe online-it të huaj edhe pse kjo është e vështirë. Ai tha se pjesa online nuk është e lehtë, por një grup pune është ngritur edhe për këtë.
“Kemi ngritur një grup pune që po merret me pjesën Online, sepse për ne kjo është e re. Por ajo që mund të them është se deri në 1 janar do të mbyllet çdo pikë basti, përfshirë edhe këtë monopolin online. Online është një botë më vete nuk është kaq kollaj. Ndërkohë po punojmë paralelisht për të mbyllur online-et e huaja.”, – tha Rama.
