Presidenti i Ukrainës, Volodymyr Zelensky, tha gjatë një fjalimi se situata ushtarake në lindje të vendit “mbetet jashtëzakonisht e vështirë”.
Ai tha se trupat ruse po tërhiqen në veri, “ngadalë, por në një shkallë të dukshme”.
Megjithatë ai paralajmëroi se ata po grumbullohen dhe po përgatiten për goditje të reja të fuqishme në rajonin e Donbasit dhe qytetin Kharkiv.
“Beteja të forta na presin përpara. Nuk mund të mendojmë sikur i kemi kaluar të gjitha sfidat”, tha ai.
Zhvillimet:
Komiteti Ndërkombëtar i Kryqit të Kuq do të bëjë ditën e sotme një tjetër përpjekje për të evakuuar civilët në Mariupol, pasi dështoi ditën e djeshme.
Më shumë se 3 mijë qytetarë mundën që të largoheshin nga qyteti port ka njoftuar Zelensky.
Forcat ukrainase kanë rimarrë qytetet e Bucha dhe Irpin, që ndodhen në veri të Kievit.
Ministria e Jashtme ukrainase tha se nuk mund të konfirmojë ose mohojë pretendimet se forcat e saj sulmuan një depozitë nafte në Rusi.
