Policia e Lezhës ka zbardhur të tjera detaje nga ngjarja që ndodhi një ditë më parë në Kallmet, ku mbeti i plagosur administratori i zonës, Besnik Simoni. Ky i fundit është arrestuar pasi policia po e heton për dy vepra penale. Akuzat ndaj Simonit policia i ngriti pas arrestimit të autorit të dyshuar të ngjarjes, shtetasit Altin Marku, i cili u gjet i plagosur pas disa orë kërkimesh.
Blutë bëjnë me dije se gjatë konfliktit mes tyre, të dy kanë përdorur armë dhe kanë plagosur njëri-tjetrin. Ndërkohë që deri më tani, policia e Lezhës ka mundur të gjejë dhe sekuestrojë vetëm njërën armë të përdorur. Si Besnik Simoni, edhe Altin Marku ndodhen në spitalin e Traumës në Tiranë, ku burimet thanë se zyrtari lokal është në gjendje të rëndë shëndetësore.
Në vijim të veprimeve hetimore dhe operacionale të kryera për zbardhjen e rrethanave të ngjarjes së ndodhur më datë 01.04.2022, në Kallmet të Lezhës, ku si pasojë e një konflikti me armë zjarri mbeti i plagosur kryetari i Njësisë Administrative Kallmet, shtetasi Besnik Simoni, shërbimet e Policisë, pas disa orë kërkimesh, kanë bërë të mundur kapjen dhe arrestimin e shtetasit Altin Marku, i cili në momentin e kapjes është konstatuar se ka qenë i plagosur me armë zjarri, për këtë arsye është transportuar në Spitalin e Traumës Tiranë.
Si rezultat i veprimeve të thelluara hetimore, u bë e mundur zbardhja e rrethanave të ngjarjes, ku ka rezultuar se:
Më datë 01.04.2022, rreth orës 13:15, në fshatin Kallmet, Lezhë, pas një konflikti për motive të dobëta, shtetasit e lartpërmëndur kanë qëlluar me armë zjarri pistoleta, në drejtim të njëri-tjetrit dhe për pasojë ka mbetur i plagosur shtetasi Besnik Simoni, i cili pasi ka marrë ndihmën e parë mjekësore në Spitalin Rajonal Lezhë, është transportuar në Spitalin e Traumës Tiranë, ku ndodhet në gjendje të rëndë shëndetësore, ndërsa shtetasi Altin Marku është larguar menjëherë nga vendi i ngjarjes, duke u fshehur për disa orë, deri sa është lokalizuar dhe është arrestuar nga shërbimet e Policisë.
Në përfundim të veprimeve u bë arrestimi në flagrancë i shtetasve:
Altin Marku, 41 vjeç, banues në fshatin Kallmet-Lezhë, i dyshuar për veprat penale “Vrasja me dashje”, e mbetur në tentativë dhe “Prodhimi dhe mbajtja pa leje e armëve dhe municionit luftarak”;
Besnik Simoni, 42 vjeç, banues në fshatin Kallmet, Lezhë, me detyrë administrator i Njësisë Administartive Kallmet, Bashkia Lezhë, i dyshuar për veprat penale “Vrasja me dashje”, e mbetur në tentativë dhe “Prodhimi dhe mbajtja pa leje e armëve dhe municionit luftarak”.
Në cilësinë e provës materiale janë sekuestruar:
1 armë zjarri pistoletë, me një krehër me 6 fishekë, e cila dyshohet se është përdorur nga shtetasi A. M., si dhe dy automjete.
Vijon puna për gjetjen e armës tjetër pistoletë, të përdorur gjatë konfliktit.
Materialet proceduriale i kaluan Prokurorisë së Rrethit Gjyqësor Lezhë, për veprime të mëtejshme.
