Atentati ndaj prokurorit Ndoja, SPAK sekuestron pasuritë e Redjan Rrajës e familjarëve të tij. Redjan Rraja i cili eshte i akuzuari i vetem per atentatin ndaj prokurorit Arjan Ndoja, eshte i aferm i deputetit te PS Rrahman Rraja. Prokuroria e Posaçme Kundër Korrupsionit dhe Krimit të Organizuar bazuar në parashikimet e Ligjit nr.10192 datë 03.12.2009 “Për Parandalimin dhe Goditjen e Krimit të Organizuar dhe Trafikimit Nëpërmjet Masave Parandaluese kundër Pasurisë”, ka regjistruar në datën 22.01.2021 procedimin pasuror nr. 2, në ngarkim të pasurive të shtetasit Redjan Rraja dhe familjarëve të tij.
Në funksion të hetimeve të këtij procedimi pasuror janë kryer shumë veprime hetimore dhe në përfundim, Prokuroria e Posaçme i është drejtuar Gjykatës së Posaçme të Shkallës së Parë për Korrupsionin dhe Krimin e Organizuar me kërkesën për vendosjen e sekuestros sipas parashikimeve të Ligjit nr.10192 datë 03.12.2009. Gjykata e Posaçme e Shkallës së Parë Për Korrupsionin dhe Krimin e Organizuar me vendimin nr. 22 datë 23.10.2021 ka vendosur sekuestrimin e pasurive si më poshtë vijon:
Ø Pasuria e llojit apartament, (Njësi Tregtare) me sip. 76 m2, e ndodhur në Tiranë.
Ø Pasuria e llojit Njësi Tregtare, me sip. 30 m2, e ndodhur në Tiranë.
Ø Pasuria e llojit Njësi Tregtare, me sip. 127.5 m2, e ndodhur në Tiranë.
Ø Pasuria e llojit garazh, me sip. 18.09 m2, e ndodhur në Tiranë.
Ø Pasuria e llojit garazh, me sip. 18.09 m2, e ndodhur në Tiranë.
Ø 2 (dy) Automjete të tipit “Audi – A8”.
Ø Automjet i markës “Bentley” tipi Continental.
Ø Një orë dore tip “Roleks”.
Ø Shuma prej 2750 Euro.
Vendimi i gjykatës është ekzekutuar nga Drejtoria e Përgjithshme e Policisë së Shtetit në bashkëpunim me Agjencinë e Administrimit të Pasurive të Sekuestruara dhe Konfiskuara.
Hetimet vazhdojnë me qëllim evidentimin e pasurive të tjera që shtetasi R. Rraja dhe persona të tjerë të lidhur mund të kenë në zotërim apo në pronësi.
