Kryeministri Edi Rama ka reaguar në lidhje me situatën e krijuar në PD pas protestës së sotme. Duke iu referuar sulmeve të dyanshme mes Bashës dhe Berishës se bashkëpunojnë me të, Rama shkruan në një postim në rrjetet sociale se është koha “t’i japim ç’mundemi Shqipërisë, të bashkuar si shqiptarë dhe si qytetarë”. Kështu Rama iu ka bërë thirrje demokratëve që të lënë Bashën dhe Berishën dhe të bashkohen me të!
Postimi i plotë i Ramës:
Epo pikë e zezë, ai punon për Ramën thotë njëri ai bën punën e Ramës thotë tjetri… Besomëni, kur i shoh këto dy kufoma politike që luajnë kështjellash në mes të Tiranës dhe fajësojnë njëra-tjetrën se kush është shërbëtori im, më vjen t’u lëshoj demokratëve një kushtrim të megjithëzemërt: Ejani t’i japim ç’mundemi Shqipërisë, të bashkuar si shqiptarë, si qytetarë, si njerëz!
Lërini në fatet e parashkruara humbësin kronik të selisë blu dhe personazhin pa seli të listës së zezë, të cilët kur i sheh se çfarë marrëzish bëjnë e thonë të kujtojnë, që të dy, fjalët e Xhokerit, “Skam asgjë për të humbur. Asgjë s’më dhemb dot më. Tashmë jeta ime është thjesht një komedi”… Varuni more teneqet që të dyve këtyre.
