Receta e lëshuar nga mjeku çon në gabim farmacistin. Kështu i ka ndodhur një zotërie në një prej farmacive të Sarandës. Shkak është bërë shkrimi i pakuptueshëm i barit. Raste të tilla janë më të rralla, por shpesh ajo që është shkruar në recetë nuk mjafton. Farmacisti është i detyruar të kërkojë informacion shtesë nga pacienti.
Shqetësimi ngrihet jo vetëm nga pacientët, por edhe nga farmacistët. Sipas Presidentes së Urdhrit të Farmacistit, Diana Toma kjo vjen jo vetëm nga shkrimi, por dhe nga përshkrimi i barit. E para ka të bëjë me kaligrafinë, në shumë raste të paqartë e të palexueshme ndërsa e dyta me emrin që shkruhet ilaçi, atë tregtar dhe jo të molekulës.
“Emrat tregtar jo që janë larmi në varësi të firmave të prodhimit, por ndodh që mund ti kesh shumë të ngjashëm, një emër me një emër ndodh me ndryshimin e vetëm një zanore apo bashkëtingëllore në të shkruar, ti ke vështirësi në të identifikuar dhe mund të kushtosh njërën për tjetrën mirëpo njëra për tjetrën nuk të çojnë tek e njëjta molekulë, por tek molekula të ndryshme e për pasojë në gabime në të mjekuar. Penalizohet pacienti, por dhe farmacisti që i dha mjekimin e të tëra këto nga mënyrat e të shkruarit të barit në recetë”, tha Toma.
Urdhri i Farmacistit ka një kërkesë për ministrinë e Shëndetësisë. “E kemi diskutuar dhe në mbledhjen e Këshillit Kombëtar të Urdhrit të Farmacistit që është dhe organi ynë vendimmarrës, në mënyrë që ti përsërisnim kërkesën tonë ministres së Shëndetësisë që autoriteti i saj të ndikonte për të shkruar barin me emrin xhenerik pra me molekulën e tij se është formë lehtësisht më evidentueshme se emri tregtarë”, shton Toma për Abcnews. Receta është dokument zyrtar me fuqi ligjore e sipas Urdhrit të Farmacistit duhet të ketë një rregullore për hartimin dhe më pas për përdorimin e saj.
