Ka ndërruar jetë një prej të plagosurve nga shpërthimi në transformatorin e tensionit të lartë në kilometrin e dytë të Autostradës Tiranë-Durrës.
Punonjësi i plagosur ndërroi jetë në spital. Nga shpërthimi mbetën të plagosur edhe 2 punonjës të tjerë, të cilët po marrin ndihmën mjekësore në spitalin e Traumës në Tiranë. Ngjarja ndodhi rreth orës 12:00 në afërsi të një objekti në rekonstruksion. Te plagosurit janë punonjës të firmës që punonin aty ku ndodhi shpërthimi.
Në vendngjarje mbërritën 5 ambulanca.
“Transformatori elektrik shpërtheu si pasojë e një shkëndije elektrike. Nga shpërthimi mbetën të dëmtuar 3 punonjësit e këtij objekti shtetasit me iniciale GJ. S., S. Ç., dhe F. Ç., të cilët u dërguan në spital për ndihmë mjekësore,”-raporton policia.
Incidenti ndodhi për shkak të punimeve në një kompani.
“Dy punëtorë të kësaj firme kanë shkurtuar distancën me linjën 110 kV të OST, çka ka shkaktuar masë dhe mbeti për disa minuta i stakuar NST Kashar,”-njofton OSHEE. Defekti la pa energji bizneset përgjatë autostradës, zonën e Kamzës, Vorës dhe Mëzezit. OSHEE furnizoi stacionin me linjën rezervë dhe aktualisht kanë marrë energji të gjithë zonat e lartpërmendura. Aktualisht është stakuar për masë vetëm fideri që furnizon me energji zonën pranë kompanisë ku ndodhi shpërthimi, informon OSHEE Grupi hetimor ndodhet në vendngjarje dhe po vijon punën për sqarimin e mëtejshëm të rrethanave të ngjarjes.
